ᠡᠵᠢ ᠰᠠᠬᠢᠭᠤᠰᠦ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2021/4/7
     ᠲᠠᠰᠢᠭᠤ ᠭᠠᠵᠠᠷ ᠰᠡᠬᠦᠳᠡᠷ ᠲᠠᠰᠤᠷᠠᠬᠤ ᠦᠭᠡᠢ᠂ ᠲᠠᠪᠢ ᠭᠠᠷᠤᠭᠰᠠᠨ ᠬᠦᠮᠦᠨ ᠳᠤ ᠮᠦᠷᠦᠭᠡᠳᠦᠯ ᠲᠠᠰᠤᠷᠠᠬᠤ ᠦᠭᠡᠢ ᠭᠡᠵᠤ ᠦᠨᠡᠨ ᠪᠢᠯᠢᠤ ᠳ᠋ᠠ᠃      ᠲᠡᠷᠭᠡᠯ ᠰᠠᠷᠠᠨ ᠵᠡᠬᠦᠨ ᠬᠦᠳᠦᠯ ᠲᠡᠭᠡᠬᠦᠷ ᠠᠯᠭᠤᠷᠬᠠᠨ ᠮᠠᠨᠳᠤᠪᠠ᠃ ᠰᠠᠷᠨ ᠲᠡᠷᠭᠡᠯᠰᠢᠵᠦ ᠬᠠᠪᠢᠷᠭᠠᠯᠠᠬᠤ ᠨᠢ ᠤᠳᠤᠨ ᠤᠷᠤᠨ ᠤ ᠵᠦᠢ ᠭᠡᠳᠡᠭ ᠪᠤᠯᠪᠠᠴᠤ ᠰᠠᠷᠠᠨ ᠳᠤ ᠲᠡᠩᠳᠡᠬᠦᠤ ᠬᠠᠶᠢᠷᠠᠳᠠᠢ ᠪᠠᠶᠢᠳᠠᠭ ᠡᠵᠢ ᠶᠢᠨ ᠢᠶᠠᠨ ᠰᠡᠳᠬᠢᠯᠭᠡ ᠶᠢ ᠮᠦᠷᠳᠡᠬᠦ ᠭᠡᠵᠤ ᠠᠬᠢᠪᠠᠯ᠂ ᠨᠠᠳᠠ ᠳᠤ ᠨᠡᠷ᠎ᠡ ᠦᠭᠳᠡᠭ ᠬᠦᠨ ᠰᠠᠨᠠᠭ᠎ᠠ ᠶᠢ ᠨᠢ ᠤᠶᠢᠯᠠᠭᠠᠬᠤ ᠪᠠᠷ ᠦᠨᠤ ᠦᠳᠡᠰᠢ ᠶᠢᠨ ᠰᠠᠷᠨ ᠶᠢ ᠪᠦᠬᠦᠯᠢ ᠬᠤᠶᠠᠷ ᠴᠠᠭ ᠬᠦᠯᠢᠶᠡᠪᠡ᠃ ᠰᠠᠷᠨ ᠲᠦᠪ ᠲᠦᠬᠦᠷᠢᠭ᠂ ᠨᠡᠭᠡᠷᠡᠨ ᠡᠵᠢ ᠶᠢᠨ ᠮᠢᠨᠢ ᠶᠠᠷᠢᠳᠠᠭ ᠦᠯᠢᠭᠡᠷ ᠰᠢᠭ ᠲᠤᠳᠤᠷ᠎ᠠ ᠨᠢ ᠨᠠᠷᠠᠰᠤᠨ ᠮᠤᠳᠣ᠂ ᠴᠠᠩ ᠡᠧ ᠲᠠᠬᠢᠨᠢ᠂ ᠴᠠᠭᠠᠨ ᠲᠠᠤᠯᠠᠢ ᠪᠠᠶᠢᠬᠤ ᠴᠦ ᠶᠤᠮ ᠤᠤ ᠳ᠋ᠠ⁈ ᠰᠡᠷᠢᠬᠦᠨ ᠰᠠᠯᠬᠢ ᠰᠡᠷᠴᠢᠬᠢᠨᠡᠵᠦ ᠰᠡᠪᠡᠯᠭᠡ ᠮᠢᠨᠢ ᠭᠡᠶᠢᠰᠴᠤ ᠲᠤᠳᠤᠷ᠎ᠠ ᠲᠤᠩ ᠴᠦ ᠤᠶᠢᠳᠬᠠᠷᠳᠠᠢ ᠰᠠᠨᠠᠭᠳᠠᠨ᠎ᠠ᠃      ︽ᠪᠠᠰᠠ ᠨᠢᠭᠡᠨ ᠨᠠᠮᠦᠷ ᠪᠤᠯᠴᠢᠬᠠᠬᠤ ᠨᠢ ᠡ ᠡᠵᠢ ᠡ︾ ᠭᠡᠵᠤ ᠭᠠᠭᠴᠠᠭᠠᠷ ᠲᠦᠳᠦᠨᠡᠬᠦ ᠳᠤ ᠬᠠᠯᠠᠭᠤᠨ ᠨᠢᠯᠪᠤᠰᠤ ᠬᠠᠴᠠᠷ ᠢ ᠲᠠᠭᠠᠨ ᠣᠷᠣᠰᠴᠡᠢ᠃ ᠦᠷ᠎ᠡ ᠭᠡᠤᠭᠡᠳ ᠤᠨ ᠢᠶᠠᠨ ᠲᠦᠯᠦᠭᠡ ᠢᠯᠡᠬᠦᠤ ᠰᠠᠨᠠᠭᠠᠰᠢᠷᠠᠬᠤ ᠪᠠᠷ ᠡᠵᠢ ᠶᠢᠨ ᠢᠶᠠᠨ ᠠᠴᠢ ᠶᠢ ᠤᠯᠠᠮ ᠢᠶᠠᠷ ᠮᠡᠳᠡᠷᠡᠵᠦ ᠰᠠᠨᠠᠬᠤ ᠪᠤᠯᠵᠠᠢ᠃ ᠠᠢ᠂ ᠰᠠᠨᠠᠬᠤ ᠦᠶ᠎ᠡ ᠳᠤ ᠬᠠᠶᠢᠷ᠎ᠠ ᠶᠢᠨ ᠠᠮᠳᠠ ᠶᠢ ᠤᠬᠠᠵᠦ᠂ ᠰᠠᠯᠬᠤ ᠡᠷᠡᠨ ᠳᠤ ᠡᠩᠰᠡᠷᠡᠯ ᠤᠨ ᠭᠡᠴᠡᠬᠦᠤ ᠶᠢ ᠠᠮᠰᠠᠳᠠᠭ ᠪᠠᠶᠢᠵᠠᠢ᠃ ᠡᠵᠢ ᠮᠢᠨᠢ ᠪᠠᠶᠢᠭᠰᠠᠨ ᠪᠤᠯ ᠳ᠋ᠠ ᠁      ᠡᠵᠢ ᠶᠢᠨ ᠢᠶᠠᠨ ᠲᠤᠬᠠᠢ ᠶᠠᠭᠤᠮ᠎ᠠ ᠪᠢᠴᠢᠬᠦ ᠶᠤᠮ ᠰᠠᠨ ᠭᠡᠵᠤ ᠤᠯᠠᠨ ᠤᠳᠠᠭ᠎ᠠ ᠪᠤᠳᠤᠭᠰᠠᠨ ᠴᠦ ᠶᠠᠭᠠᠬᠢᠵᠦ ᠡᠬᠢᠯᠡᠬᠦ ᠪᠠᠨ ᠮᠡᠳᠡᠭᠡ ᠦᠭᠡᠢ ᠶᠠᠪᠤᠭᠰᠠᠭᠠᠷ ᠭᠡᠨᠡᠳᠳᠡ ᠨᠢᠭᠡ ᠭᠤᠶᠤ ᠭᠠᠷᠴᠠᠭ ᠤᠶᠤᠨ ᠪᠤᠳᠤᠯ ᠳᠤ ᠬᠢᠯᠠᠰᠬᠢᠨ ᠬᠠᠷᠪᠤᠬᠤ ᠪᠠᠷ ᠦᠪᠡᠷ ᠤᠨ ᠡᠷᠭᠡ ᠦᠭᠡᠢ ᠪᠢᠷ ᠢᠶᠠᠨ ᠪᠠᠷᠢᠯ᠎ᠠ᠃ ᠮᠢᠨᠤ ᠡᠵᠢ ᠬᠤᠷᠢᠨ ᠨᠠᠰᠤᠳᠠᠢ ᠳᠠᠭᠠᠨ ᠠᠪᠤ ᠳᠤ ᠮᠤᠷᠳᠠᠵᠦ ᠢᠷᠡᠪᠡ᠃ ᠠᠪᠤ ᠠᠵᠢᠯ ᠠᠯᠪᠠ ᠲᠠᠢ ᠪᠤᠯᠬᠤᠷ ᠪᠠᠶᠢᠭᠤᠯᠭ᠎ᠠ ᠳᠠᠭᠠᠨ ᠶᠠᠪᠤᠴᠢᠬᠠᠳᠠᠭ᠃ ᠡᠵᠢ᠂ ᠬᠤᠯᠠᠳᠠᠭᠠᠳ ᠤᠳᠠᠭ᠎ᠠ ᠦᠭᠡᠢ ᠨᠤᠳᠤᠭ ᠤᠰᠤᠨ ᠶᠤᠮ ᠪᠢᠯᠨ᠂ ᠰᠠᠳᠤᠨ ᠲᠦᠷᠦᠯ ᠢᠶᠠᠨ ᠡᠷᠢᠬᠦ ᠦᠭᠡᠢ ᠶᠠᠭᠠᠬᠢᠨ᠎ᠠ᠃ ᠬᠤᠩᠭᠤᠷ ᠵᠠᠶᠠᠭᠠᠨ ᠤ ᠪᠦᠰᠡᠬᠦᠢ᠂ ᠬᠤᠷᠢᠮᠯᠠᠭᠠᠳ ᠤᠳᠠᠭ᠎ᠠ ᠦᠭᠡᠢ ᠬᠠᠨᠢ ᠶᠤᠮ ᠪᠢᠯᠨ ᠰᠠᠶᠢᠬᠠᠨ ᠨᠦᠬᠦᠷ ᠢᠶᠠᠨ ᠪᠤᠳᠤᠬᠤ ᠦᠭᠡᠢ ᠶᠠᠭᠠᠬᠢᠨ᠎ᠠ᠃ ᠡᠵᠢ ᠤᠶᠢᠳᠬᠤ ᠳᠠᠭᠠᠨ ᠰᠠᠷᠠ ᠶᠢ ᠬᠠᠷᠠᠳᠠᠭ᠃ ᠲᠡᠷᠨ ᠨᠢ ᠶᠠᠭ ᠯᠨ ᠲᠦᠷᠦᠭᠰᠡᠨ ᠨᠤᠳᠤᠭ ᠤᠯᠠᠭᠠᠨᠰᠦ᠋ᠮ᠎ᠡ ᠶᠢᠨ ᠬᠢᠨᠢ ᠲᠡᠨᠳᠡ ᠠᠴᠠ ᠮᠠᠨᠳᠤᠳᠠᠭ ᠰᠢᠭ᠋ ᠰᠠᠨᠠᠭᠳᠠᠨ᠎ᠠ᠃ ᠰᠠᠨᠠᠬᠤ ᠶᠢᠨ ᠤᠯᠠᠮ ᠳᠤ ᠤᠬᠢᠯᠠᠳᠠᠭ ᠴᠦ ᠮᠦᠷᠦᠭᠡᠳᠬᠦ ᠶᠢᠨ ᠵᠡᠷᠭᠡ ᠳᠤ ᠰᠠᠶᠢᠨ ᠤ ᠰᠤᠪᠢᠩ ᠶᠡᠷᠦ ᠲᠠᠰᠤᠷᠠᠭ᠎ᠠ ᠦᠭᠡᠢ᠃ ᠰᠠᠷᠨ ᠲᠡᠶᠢᠮᠤ ᠯᠨ ᠲᠦᠬᠦᠷᠢᠭ᠂ ᠲᠡᠶᠢᠮᠤ ᠯᠨ ᠰᠠᠷᠠᠭᠤᠯᠬᠠᠨ᠂ ᠰᠡᠬᠦᠯᠡᠷ ᠭᠡᠤᠭᠡᠨ ᠲᠠᠢ ᠪᠤᠯᠪᠠᠯ ︽ᠰᠠᠷᠠᠩᠭᠤᠸ᠎ᠠ︾ ᠭᠡᠵᠤ ᠨᠡᠷ᠎ᠡ ᠦᠭᠬᠦ ᠶᠢ ᠰᠡᠳᠬᠢᠬᠦ ᠳᠤᠨᠢ ᠲᠤᠳᠤᠷ᠎ᠠ ᠨᠢ ᠲᠤᠭᠳᠤᠯᠵᠦ᠂ ᠴᠢᠷᠠᠢ ᠨᠢ ᠤᠯᠠᠪᠠᠯᠵᠠᠵᠦ᠂ ᠭᠡᠤᠭᠡᠳ ᠤᠨ ᠤᠬᠢᠯᠠᠬᠤ ᠲᠠᠭᠤᠨ ᠰᠤᠨᠤᠰᠳᠠᠭ᠎ᠠ ᠶᠤᠮ ᠰᠢᠭ᠋ ᠪᠠᠶᠠᠰᠬᠤᠯᠠᠩ ᠲᠦᠷᠦᠨ᠎ᠡ ᠭᠡᠵᠢ᠃ ᠬᠠᠶᠢᠷ᠎ᠠ ᠭᠡᠳᠡᠭ ᠬᠦᠯᠢᠶᠡᠬᠦ ᠳᠤ ᠬᠦᠵᠢ ᠶᠢᠨ ᠤᠳᠤᠭ᠎ᠠ ᠰᠢᠭ᠋ ᠤᠳᠠᠭᠠᠨ ᠴᠦ ᠬᠦᠰᠡᠬᠦ ᠳᠤ ᠬᠦᠯᠦᠭ ᠤᠨ ᠬᠤᠷᠳᠤ ᠰᠢᠭ᠋ ᠲᠦᠷᠭᠡᠨ ᠢᠷᠡᠳᠡᠭ ᠶᠤᠮ ᠪᠠᠶᠢᠵᠠᠢ᠃ ᠡᠵᠢ ᠠᠬ᠎ᠠ ᠶᠢᠨ ᠲᠠᠷᠠᠭ᠎ᠠ ᠨᠠᠮ᠎ᠠ ᠶᠢ ᠬᠦᠡᠭᠭᠡᠵᠢᠭᠡᠳ ᠵᠤᠷᠢᠯᠭ᠎ᠠ ᠪᠠᠨ ᠪᠠᠶᠡᠯᠡᠬᠦᠯᠪᠡ᠃ ᠨᠡᠷ᠎ᠡ ᠪᠤᠯ ᠨᠡᠷ᠎ᠡ ᠯᠨ ᠰᠢᠳᠡ ᠶᠠᠭᠤᠨ ᠳᠤ ᠲᠡᠭᠡᠳᠡᠯ᠎ᠡ ᠪᠠᠶᠠᠷᠯᠠᠳᠠᠭ ᠶᠤᠮ ᠳ᠋ᠠ ᠡᠵᠢ ᠮᠢᠨᠢ᠃      ᠪᠢ ᠦᠨᠳᠦᠷ ᠲᠤᠮᠳᠠᠳᠤ ᠪᠠᠨ ᠲᠡᠬᠦᠰᠭᠡᠭᠡᠳ ᠤᠶᠤᠳᠠᠨ ᠤ ᠡᠩᠨᠡᠭᠡ ᠠᠴᠠ ᠬᠤᠴᠤᠷᠴᠤ ᠭᠤᠨᠢᠬᠤ ᠳᠠᠭᠠᠨ ᠰᠡᠳᠬᠢᠯ ᠢᠶᠠᠨ ᠠᠷᠭᠠᠳᠠᠵᠦ ᠵᠢᠭᠠᠯ ᠵᠤᠭᠤᠯ ᠰᠤᠨᠢᠨ ᠮᠡᠳᠡᠭᠡ᠂ ᠬᠢᠯᠪᠡᠭᠡᠨ ᠦᠬᠦᠯᠡᠯᠭᠡ ᠭᠡᠵᠤ ᠠᠪᠠᠷ ᠲᠠᠪᠠᠷ ᠶᠠᠭᠤᠮ᠎ᠠ ᠪᠢᠴᠢᠵᠦ ᠰᠠᠭᠤᠬᠤ ᠳᠤ ᠡᠵᠢ ᠮᠢᠨᠢ ᠬᠠᠵᠠᠭᠤ ᠠᠴᠠ ᠬᠠᠷᠠᠴᠢᠬᠠᠭᠠᠳ᠄ ︽ᠮᠢᠨᠤ ᠦᠬᠢᠨ ᠨᠠᠭᠠᠴᠤ ᠪᠠᠨ ᠲᠠᠭᠤᠷᠢᠶᠠᠴᠢᠬᠠᠵᠠᠢ᠂ ᠬᠤᠶᠠᠳᠤᠭᠠᠷ ᠨᠠᠭᠠᠴᠤ ᠴᠢᠨᠢ ᠶᠡᠭᠡ ᠭᠡᠯᠡᠮᠦᠷᠴᠢ ᠠᠮᠠᠨ ᠪᠡᠯᠡᠭ ᠲᠠᠢ ᠬᠦᠮᠦᠨ ᠪᠠᠶᠢᠭᠰᠠᠨ᠂ ᠰᠡᠬᠦᠯᠡᠷ ᠮᠢᠨᠤ ᠦᠬᠢᠨ ᠵᠤᠬᠢᠶᠠᠯᠴᠢ ᠪᠤᠯᠪᠠᠯ ᠡᠵᠢ ᠶᠢᠨ ᠢᠶᠠᠨ ᠴᠢᠮᠠᠳᠤ ᠨᠡᠷ᠎ᠡ ᠦᠭᠬᠦᠭᠰᠡᠨ ᠰᠠᠨᠠᠭ᠎ᠠ ᠶᠢ ᠰᠠᠶᠢᠬᠠᠨ ᠪᠢᠴᠢ ᠡ︾ ᠭᠡᠪᠡ᠃      — ᠵᠤᠬᠢᠶᠠᠯᠴᠢ ᠪᠤᠯᠤᠨ᠎ᠡ ᠭᠡᠨ᠎ᠡ ᠡ︖ ᠭᠡᠳᠦᠢ ᠶᠡᠭᠡ ᠰᠠᠨᠠᠭ᠎ᠠ ᠲᠠᠢ ᠪᠤᠢ︖ ᠪᠢ ᠡᠵᠢ ᠪᠠᠨ ᠬᠠᠷᠠᠭᠠᠳ ᠫᠦᠰᠬᠢᠳᠠᠯ᠎ᠠ ᠢᠨᠢᠶᠡᠪᠡ᠃ ᠮᠢᠨᠤ ᠨᠡᠷ᠎ᠡ ᠲᠡᠶᠢᠮᠤ ᠰᠠᠶᠢᠬᠠᠨ ᠤᠤ︖ ᠪᠢ ᠡᠵᠢ ᠠᠴᠠ ᠵᠤᠷᠢᠭᠤᠳᠠ ᠠᠰᠠᠭᠤᠵᠦ ᠤᠷᠮ᠎ᠠ ᠶᠢ ᠨᠢ ᠬᠦᠭᠵᠢᠭᠡᠪᠡ᠃ ︽ᠰᠠᠷᠠᠨ ᠤ ᠭᠡᠷᠡᠯ ᠰᠦᠨᠢ ᠶᠢᠨ ᠳ᠋ᠧᠩ᠂ ᠰᠠᠶᠢᠬᠠᠨ ᠦᠷ᠎ᠡ ᠬᠦᠮᠦᠨ ᠤ ᠳ᠋ᠧᠩ︾ ᠭᠡᠵᠤ ᠡᠵᠢ ᠮᠢᠨᠢ ᠰᠢᠯᠤᠭᠤᠬᠠᠨ ᠶᠠᠷᠢᠵᠦ ᠭᠠᠷᠬᠤ ᠳᠤ ᠠᠪᠤ ᠴᠦ ᠲᠡᠮᠵᠢᠵᠦ ᠡᠷᠡᠭᠡᠢ ᠬᠤᠷᠤᠭᠤ ᠭᠠᠷᠭᠠᠪᠠ᠃ ᠭᠡᠷ ᠲᠤ ᠨᠢᠭᠡ ᠬᠤᠷᠤᠮ ᠪᠠᠶᠠᠷ ᠪᠠᠭ᠋ᠠᠳᠤᠯ ᠢᠶᠠᠷ ᠪᠢᠯᠬᠠᠪᠠ᠃      ᠠᠯᠳᠠ ᠪᠠᠷ ᠰᠤᠯᠢᠰᠢ ᠦᠭᠡᠢ ᠴᠠᠭ ᠮᠦᠴᠨ ᠪᠤᠯ ᠠᠪᠤ ᠡᠵᠢ ᠲᠠᠢ ᠪᠠᠨ ᠪᠠᠶᠢᠭᠰᠠᠨ ᠡᠷᠡᠨ ᠬᠡᠳᠡᠭ ᠢ ᠤᠬᠠᠭᠠᠷᠠᠵᠦ ᠠᠮᠢᠳᠣᠷᠠᠬᠤ ᠬᠤᠷᠸ᠎ᠠ ᠶᠢᠨ ᠬᠠᠮᠤᠭ ᠠᠩᠬᠠᠨ ᠤ ᠠᠭᠤᠯᠭ᠎ᠠ ᠠᠴᠠ ᠯᠨ ᠤᠩᠰᠢᠬᠤ ᠶᠤᠮ ᠳ᠋ᠠ᠃ ᠦᠷ᠎ᠡ ᠪᠠᠨ ᠰᠠᠨᠠᠬᠤ ᠪᠠᠷ ᠠᠯᠵᠢᠶᠠᠯ ᠨᠢ ᠲᠠᠶᠢᠯᠤᠭᠳᠠᠵᠦ᠂ ᠦᠭᠡᠳᠡ ᠶᠢ ᠨᠢ ᠬᠦᠰᠡᠬᠦ ᠪᠠᠷ ᠴᠢᠯᠡᠭᠡ ᠨᠢ ᠮᠠᠷᠳᠠᠭᠳᠠᠳᠠᠭ ᠢ ᠡᠵᠢ ᠬᠦᠮᠦᠨ ᠭᠡᠳᠡᠭ ᠪᠢᠵᠨ⁈ ᠮᠢᠨᠤ ᠡᠵᠢ ᠭᠡᠵᠤ ᠲᠤᠮᠳᠠ ᠶᠢᠨ ᠪᠡᠶ᠎ᠡ ᠲᠠᠢ᠂ ᠲᠤᠩ ᠭᠤᠪᠠᠶᠢᠬᠠᠨ ᠬᠦᠮᠦᠨ ᠪᠠᠶᠢᠭᠰᠠᠨ᠃ ᠨᠤᠭᠤᠭᠠᠨ ᠲᠠᠯ᠎ᠠ ᠪᠠᠷ ᠠᠶᠠᠯᠠᠬᠤ ᠳᠤ ᠴᠡᠴᠡᠭ ᠠᠴᠠ ᠤᠨᠳᠤᠤ ᠰᠠᠶᠢᠬᠠᠨ ᠦᠩᠭᠡ ᠬᠠᠮᠢᠭ᠎ᠠ ᠪᠠᠶᠢᠬᠤᠪ᠂ ᠨᠡᠷᠡᠳᠤ ᠶᠢᠨ ᠵᠠᠢ ᠳᠤ ᠠᠮᠢᠳᠤᠷᠠᠬᠤ ᠳᠤ ᠡᠵᠢ ᠠᠴᠠ ᠦᠭᠡᠷ᠎ᠡ ᠭᠤᠶᠤ ᠬᠦᠮᠦᠨ ᠭᠡᠨ ᠪᠠᠶᠢᠬᠤᠪ᠃ ᠨᠠᠮ᠎ᠠ ᠶᠢ ᠮᠡᠳᠡᠭᠡ ᠤᠷᠤᠬᠤ ᠦᠶ᠎ᠡ ᠳᠤ ᠡᠵᠢ ᠮᠢᠨᠢ ᠲᠠᠩᠳᠠ ᠲᠤᠰᠤᠨ ᠳ᠋ᠧᠩ ᠤᠨ ᠲᠤᠤᠷ᠎ᠠ ᠱᠠᠬᠠᠢ ᠭᠤᠳᠤᠯ ᠰᠢᠷᠢᠴᠢᠭᠡᠭᠰᠡᠨ ᠡᠰᠡᠬᠦᠯ᠎ᠡ ᠬᠤᠪᠴᠠᠰᠤ ᠬᠤᠨᠠᠷ ᠤᠶᠤᠴᠢᠬᠠᠭᠰᠠᠨ ᠰᠠᠭᠤᠳᠠᠭ᠃ ᠪᠢ ᠪᠠᠰᠠ ᠰᠤᠨᠢᠨ ᠶᠤᠮ᠂ ᠡᠵᠢ ᠶᠢᠨ ᠢᠶᠠᠨ ᠡᠪᠦᠳᠦᠭ ᠢ ᠲᠡᠷᠡᠯᠡᠵᠦ ︽ᠳ᠋ᠦᠩᠬᠦ᠋ᠸᠧ ᠰᠢᠶᠠᠨᠱᠧᠩ︾᠂ ︽ᠬᠤᠳᠠᠯᠴᠢ ᠬᠦᠤ ᠶᠢᠨ ᠦᠯᠢᠭᠡᠷ︾᠂ ︽ᠴᠦᠢᠳᠧᠩ ᠬᠤᠳᠠᠯᠳᠤᠭᠴᠢ ᠭᠡᠤᠭᠡᠨ︾ ᠵᠡᠷᠬᠡ ᠦᠯᠢᠭᠡᠷ ᠢ ᠨᠢ ᠰᠤᠨᠤᠰᠤᠭᠰᠠᠭᠠᠷ ᠪᠠᠶᠢᠵᠦ ᠤᠨᠳᠠᠵᠦ ᠤᠷᠬᠢᠳᠠᠭ᠃ ᠮᠠᠷᠭᠠᠰᠢ ᠦᠷᠯᠦᠭᠡ ᠨᠢ ᠪᠤᠰᠬᠤ ᠳᠤ ᠪᠤᠳᠠᠭ᠎ᠠ ᠨᠤᠭᠤᠭ᠎ᠠ ᠪᠦᠷ ᠬᠢᠴᠢᠭᠡᠭᠡᠳ ᠬᠠᠯᠠᠭᠤᠬᠠᠨ ᠲᠠᠯᠪᠢᠵᠦ ᠪᠠᠷᠢᠭᠠᠳᠠ ᠶᠢᠨ ᠠᠵᠢᠯ ᠳᠤ ᠶᠠᠪᠤᠳᠠᠭ᠃      ᠲᠡᠷᠨ ᠦᠶ᠎ᠡ ᠳᠤ ᠬᠤᠪᠢ ᠤᠯᠭᠤᠵᠦ ᠵᠤᠨ ᠳᠠᠭᠠᠨ ᠰᠦ᠂ ᠵᠢᠯ ᠤᠨ ᠡᠴᠦᠰ ᠠᠮᠤ ᠪᠤᠳᠠᠭ᠎ᠠ᠂ ᠦᠭᠡᠷ ᠬᠤᠨᠢᠨ ᠤ ᠮᠢᠬ᠎ᠠ ᠬᠤᠪᠢᠶᠠᠳᠠᠭ᠃ ᠡᠳᠦᠷ ᠤᠨ ᠬᠦᠯᠦᠰᠤᠨ ᠮᠦᠩᠬᠦ ᠬᠠᠮᠤᠭ ᠰᠠᠶᠢᠨ ᠨᠢ ᠠᠷᠪᠠᠨ ᠬᠤᠪᠢ᠃ ᠡᠵᠢ ᠪᠦᠳᠦᠨ ᠬᠤᠪᠢ ᠤᠯᠬᠤ ᠭᠡᠵᠤ ᠡᠷᠳᠡᠯᠡᠨ ᠶᠠᠪᠤᠵᠦ ᠤᠷᠦ᠋ᠢᠬᠠᠨ ᠬᠠᠷᠢᠵᠦ ᠢᠷᠡᠳᠡᠭ᠃ ᠨᠢᠭᠡ ᠭᠡᠷ ᠤᠨ ᠨᠠᠶᠢᠮᠠᠨ ᠠᠮᠨ ᠪᠠᠭ᠎ᠠ ᠲᠤᠭ᠎ᠠ ᠤᠤ︖ ᠡᠵᠢ ᠢᠯᠡᠬᠦᠤ ᠲᠤᠭ᠎ᠠ ᠨᠤᠷᠮ᠎ᠡ ᠤᠯᠬᠤ ᠭᠡᠵᠤ ᠰᠦᠨᠢ ᠴᠦ ᠠᠵᠢᠯᠯᠠᠳᠠᠭ᠃ ᠰᠠᠭᠠᠭ ᠬᠦᠪᠢᠬᠦ᠂ ᠰᠢᠰᠢ ᠱᠠᠭᠠᠯᠠᠬᠤ᠂ ᠨᠠᠷᠢᠮᠤ ᠶᠢᠨ ᠲᠤᠯᠤᠭᠠᠢ ᠴᠠᠪᠴᠢᠬᠤ ᠵᠡᠷᠭᠡ ᠳᠤ ᠠᠯᠳᠠᠯ ᠦᠭᠡᠢ ᠤᠷᠤᠯᠴᠠᠳᠠᠭ᠃ ᠪᠢ ᠵᠠᠷᠢᠮ ᠰᠦᠨᠢ ᠳᠡᠭᠡᠨ ᠡᠵᠢ ᠪᠠᠨ ᠲᠠᠭᠠᠵᠦ ᠦᠳᠦᠷᠮ᠎ᠡ ᠲᠡᠭᠡᠷ᠎ᠡ ᠤᠴᠢᠵᠦ ᠵᠠᠬ᠎ᠠ ᠳᠤᠨᠢ ᠰᠠᠭᠤᠳᠠᠭ᠃ ᠤᠯᠠᠨ ᠬᠦᠮᠦᠨ ᠬᠠᠳᠤᠵᠦ ᠪᠤᠭᠤᠵᠢᠯᠠᠭᠰᠠᠨ ᠪᠤᠯᠬᠤᠷ ᠨᠠᠷᠢᠮᠤ ᠶᠢᠨ ᠭᠡᠮᠵᠢᠶ᠎ᠡ ᠨᠢ ᠶᠡᠭᠡ ᠪᠠᠭ᠎ᠠ ᠲᠠᠢ᠃ ᠲᠠᠷᠤᠭ᠎ᠠ᠂ ᠰᠠᠳᠤᠨ ᠳᠠᠭᠠᠨ ᠪᠠᠭ᠎ᠠ ᠪᠤᠭᠤᠵᠢ ᠶᠢ ᠰᠤᠩᠭᠤᠨ ᠦᠭᠴᠤ ᠡᠵᠢ ᠳᠤ ᠪᠦᠳᠦᠬᠦᠨ ᠪᠦᠳᠦᠬᠦᠨ ᠢ ᠦᠭᠬᠦᠨ᠎ᠡ᠃ ᠲᠡᠳᠡᠨᠤᠰ ᠡᠷᠳᠡ ᠪᠠᠷᠠᠭᠠᠳ ᠶᠠᠪᠤᠴᠢᠬᠠᠨ᠎ᠠ᠂ ᠡᠵᠢ ᠬᠠᠮᠤᠭ ᠰᠡᠬᠦᠯ ᠳᠤ ᠲᠠᠭᠤᠰᠬᠠᠴᠢᠬᠠᠭᠠᠳ ᠬᠠᠷᠢᠨ᠎ᠠ᠃ ᠪᠠᠰᠠ ᠨᠠᠮ᠎ᠠ ᠶᠢ ᠲᠠᠭᠠᠷᠠᠬᠤ ᠠᠴᠠ ᠠᠶᠤᠵᠦ ᠬᠤᠪᠴᠠᠰᠤ ᠪᠠᠨ ᠲᠠᠶᠢᠯᠵᠦ ᠳᠠᠪᠬᠤᠯᠠᠨ᠎ᠠ᠃      — ᠡᠵᠢ ᠡ᠂ ᠲᠠᠷᠨ ᠲᠠᠷᠤᠭ᠎ᠠ ᠶᠠᠭᠤᠨ ᠳᠤ ᠴᠢᠮᠠᠳᠤ ᠶᠡᠭᠡ ᠶᠡᠭᠡ ᠪᠤᠭᠤᠵᠢ ᠦᠭᠳᠡᠭ ᠪᠤᠢ︖ ᠦᠨᠡᠨᠳᠡᠭᠡᠨ ᠪᠢ ᠤᠬᠠᠭᠠᠨ ᠤᠷᠤᠴᠢᠬᠠᠭᠰᠠᠨ ᠭᠡᠬᠦ ᠳᠤ ᠪᠤᠯᠤᠨ᠎ᠡ᠃ ᠡᠵᠢ ᠶᠢᠨ ᠢᠶᠠᠨ ᠲᠦᠯᠦᠭᠡ ᠲᠤᠭᠤᠶᠢᠬᠠᠨ ᠤᠬᠢᠯᠠᠵᠦ ᠶᠠᠪᠤᠭᠰᠠᠨ ᠢ ᠲᠡᠷᠡᠬᠦ ᠰᠠᠷᠨ ᠲᠠᠢ ᠰᠦᠨᠢ ᠶᠢᠨ ᠲᠡᠭᠷᠢ ᠭᠡᠷᠡᠴᠢᠯᠡᠨ᠎ᠡ᠃ ᠲᠤᠷᠤᠮᠵᠢᠯᠠᠯ ᠭᠡᠳᠡᠭ ᠦᠭᠡ ᠶᠢᠨ ᠤᠬᠠᠭᠳᠠᠬᠤᠨ ᠢ ᠪᠢ ᠲᠡᠷᠨ ᠦᠶᠡᠰ ᠠᠴᠠ ᠬᠦᠨ ᠤᠶᠢᠯᠠᠭᠠᠭᠰᠠᠨ᠃      — ᠬᠠᠮᠢᠶ᠎ᠠ ᠦᠭᠡᠢ ᠬᠦᠤ ᠮᠢᠨᠢ᠂ ᠡᠵᠢ ᠨᠢ ᠴᠢᠬᠢᠷᠠᠭ ᠦᠰᠦᠭᠰᠡᠨ ᠰᠢᠤ ᠭᠡᠵᠤ ᠡᠵᠢ ᠨᠠᠮ᠎ᠠ ᠶᠢ ᠠᠷᠭᠠᠳᠠᠨ᠎ᠠ᠃ ᠲᠡᠶᠢᠮᠤ︕ ᠮᠢᠨᠤ ᠡᠵᠢ ᠶᠢᠨ ᠪᠡᠶ᠎ᠡ ᠴᠤᠭᠴᠠᠰ ᠡᠷᠡᠬᠦᠯ᠂ ᠪᠤᠳᠤᠯ ᠰᠡᠳᠬᠢᠯ ᠨᠢ ᠴᠦ ᠰᠠᠷᠠᠭᠤᠯ︕ ᠲᠡᠷᠡ ᠦᠶ᠎ᠡ ᠳᠤ ᠪᠠᠰᠠ ᠠᠵᠢᠯ ᠤᠨ ᠠᠬᠢᠴᠨ ᠪᠠᠨ ᠲᠦᠷᠭᠡᠳᠭᠡᠬᠦ ᠤᠬᠠᠭᠠᠨ ᠴᠦ ᠶᠤᠮ ᠤᠤ ᠤᠯᠠᠭᠠᠨ ᠰᠢᠰᠢ ᠬᠠᠳᠤᠵᠦ ᠣᠷᠣᠯᠳᠣᠭᠤᠯᠳᠠᠭ᠃ ᠲᠦᠷᠦᠬᠦᠯᠡᠭᠰᠡᠨ ᠳᠤᠨᠢ ᠨᠢᠭᠡ ᠵᠢᠩ ᠶᠧᠪᠢᠩ᠃ ᠪᠤᠷᠤ ᠴᠠᠭᠠᠰᠤᠨ ᠲᠤᠳᠤᠷ᠎ᠠ ᠪᠠᠭᠯᠠᠭᠰᠠᠨ ᠵᠢᠷᠭᠤᠭᠠᠨ ᠭᠡᠰᠡᠭ ᠪᠤᠤᠪᠤ ᠶᠢ ᠡᠵᠢ ᠮᠢᠨᠢ ᠠᠪᠤᠭᠠᠳ ᠢᠷᠡᠬᠦ ᠦᠶᠡᠰ ᠮᠠᠨ ᠤ ᠪᠠᠶᠠᠷᠯᠠᠭᠰᠠᠨ ᠬᠡᠵᠢ᠂ ᠪᠦᠷ ᠲᠡᠭᠡᠷ᠎ᠡ ᠲᠡᠭᠡᠷ᠎ᠡ ᠦᠰᠦᠷᠦᠭᠰᠡᠨ᠂ ᠲᠡᠬᠦᠨ ᠤ ᠠᠮᠳᠠ ᠤᠳᠤ ᠴᠦ ᠲᠠᠮᠰᠢᠶᠠᠯᠠᠭᠳᠠᠨ᠎ᠠ᠃      ᠠᠶᠢᠯ ᠤᠨ ᠰᠤᠷᠭᠠᠭᠤᠯᠢ ᠠᠴᠠ ᠪᠠᠨ ᠲᠠᠪᠰᠢᠵᠦ ᠲᠤᠮᠳᠠᠳᠤ ᠰᠤᠷᠭᠠᠭᠤᠯᠢ ᠳᠤ ᠤᠷᠤᠪᠠ ᠪᠢ᠃ ᠡᠵᠢ ᠶᠢᠨ ᠮᠢᠨᠢ ᠪᠠᠶᠠᠷᠯᠠᠭᠰᠠᠨ ᠭᠡᠵᠤ ᠰᠦᠷᠡᠭᠡᠢ᠃ ᠶᠠᠭ ᠯᠨ ᠲᠠᠷᠤᠭ᠎ᠠ ᠪᠤᠯᠵᠦ ᠪᠠᠶᠢᠭ᠎ᠠ ᠰᠢᠭ᠋᠂ ᠴᠠᠯᠢᠩ ᠠᠪᠳᠠᠭ ᠨᠤᠶᠠᠨ ᠪᠤᠯᠵᠦ ᠪᠠᠶᠢᠭ᠎ᠠ ᠴᠦ ᠶᠤᠮᠰᠢᠭ᠃ ᠭᠠᠷᠠᠭ ᠭᠠᠷᠠᠭ ᠬᠠᠷᠢᠬᠤ ᠳᠤ ᠪᠤᠭᠴᠤ ᠪᠤᠭᠴᠤ ᠬᠦᠨᠡᠰᠤ ᠲᠠᠪᠤᠰᠤ ᠲᠠᠢ ᠨᠤᠭᠤᠭ᠎ᠠ᠂ ᠬᠠᠭᠤᠷᠤᠭᠰᠠᠨ ᠠᠮᠤ ᠭᠡᠳ ᠶᠢᠰᠤᠨ ᠵᠦᠢᠯ ᠢᠶᠠᠷ ᠨᠠᠶᠢᠷᠠᠭᠤᠯᠤᠨ ᠬᠦᠪ ᠬᠦᠨᠳᠣ ᠡᠬᠦᠷᠭᠡ᠃ ᠭᠤᠴᠢᠨ ᠭᠠᠵᠠᠷ ᠤᠨ ᠵᠠᠢ ᠲᠠᠢ ᠶᠤᠮ ᠪᠢᠯᠨ ᠲᠤᠩ ᠵᠦᠳᠡᠷᠡᠯᠳᠠᠢ᠂ ᠤᠳᠤ ᠪᠤᠳᠤᠬᠤ ᠳᠤ ᠡᠵᠢ ᠶᠢᠨ ᠮᠢᠨᠢ ᠢᠳᠡᠭᠡᠯ ᠨᠠᠶᠢᠳᠠᠪᠤᠷᠢ ᠬᠦᠰᠡᠯ ᠱᠠᠭᠠᠷᠳᠠᠯᠭ᠎ᠠ ᠭᠡᠴᠢᠨᠡᠨ ᠶᠡᠭᠡ ᠬᠦᠨᠳᠤ ᠪᠠᠶᠢᠭᠰᠠᠨ ᠪᠢᠯᠨ︖ ᠦᠨᠳᠦᠷ ᠲᠤᠮᠳᠠᠳᠤ ᠳᠤ ᠶᠠᠪᠤᠭᠰᠠᠨ ᠪᠠᠶᠢᠳᠠᠯ᠎ᠠ ᠪᠠᠰᠠᠯᠨ ᠭᠡᠤᠳᠠᠢ ᠭᠡᠤᠳᠠᠢ ᠰᠢᠯᠦᠭᠡᠢ ᠶᠢᠨ ᠪᠤᠤᠪᠤ᠂ ᠰᠠᠭᠠᠭ ᠤᠨ ᠭᠤᠯᠢᠷ ᠤᠨ ᠦᠭᠡᠷ ᠪᠠᠩᠰᠢ᠂ ᠶᠤᠤ ᠶᠤᠬᠤ︕ ᠪᠢ ᠲᠤᠮᠤ ᠭᠡᠤᠭᠡᠨ ᠪᠤᠯᠴᠢᠬᠠᠭᠰᠠᠨ ᠰᠢᠤ᠂ ᠶᠠᠭᠤᠨ ᠳᠤ ᠰᠠᠨᠠᠭ᠎ᠠ ᠪᠤᠯᠤᠭᠠᠳ ᠪᠠᠶᠢᠨ᠎ᠠ ᠪᠤᠢ︖      ︽ᠡᠭᠡ ᠶᠢᠨ ᠰᠠᠨᠠᠭ᠎ᠠ ᠦᠷ᠎ᠡ ᠳᠤ᠂ ᠦᠷ᠎ᠡ ᠶᠢᠨ ᠰᠠᠨᠠᠭ᠎ᠠ ᠠᠭᠤᠯᠠᠨ ᠳᠤ︾ ᠭᠡᠭᠴᠢ ᠪᠠᠷ ᠬᠤᠶᠠᠷ ᠦᠭᠡ ᠪᠠᠨ ᠲᠠᠪᠳᠠᠬᠤ ᠶᠢ ᠨᠢ ᠶᠠᠩᠰᠢᠶ᠎ᠠ ᠭᠡᠵᠤ᠂ ᠬᠤᠶᠢᠨ᠎ᠡ ᠠᠴᠠ ᠵᠤᠪᠠᠳᠠᠭ ᠰᠡᠳᠬᠢᠯ ᠢ ᠨᠢ ᠢᠯᠡᠬᠦᠴᠨ ᠭᠡᠰᠡᠨ ᠮᠠᠨᠢ ᠭᠡᠵᠢᠶ᠎ᠡ ᠴᠦ ᠪᠤᠴᠠᠭᠠᠵᠦ ᠴᠢᠳᠠᠬᠤ ᠦᠭᠡᠢ ᠭᠡᠮᠰᠢᠯ᠂ ᠭᠡᠴᠢᠨᠡᠨ ᠡᠳᠦᠷ ᠤᠨ ᠲᠠᠷᠠᠭ᠎ᠠ ᠪᠢᠴᠢᠭᠰᠡᠨ ᠲᠤᠷᠠᠳᠬᠠᠯ ᠲᠡᠭᠡᠷ᠎ᠡ ᠲᠤᠰᠤᠯᠠᠭᠰᠠᠨ ᠨᠢᠯᠪᠤᠰᠤ ᠪᠤᠯᠪᠠ᠃ ᠡᠵᠢ ᠶᠢᠨ ᠢᠶᠠᠨ ᠡᠷᠳᠡᠯᠡᠵᠦ ᠤᠷᠦ᠋ᠢᠯᠠᠨ ᠢᠩ ᠲᠡᠭᠡᠷᠮ᠎ᠡ ᠡᠷᠢᠵᠦ ᠭᠤᠯᠢᠷ ᠭᠠᠷᠭᠠᠨ ᠬᠦᠨᠡᠰᠤ ᠲᠤᠭᠤᠰᠤ ᠬᠢᠭᠰᠡᠨ ᠬᠦᠰᠡᠯ ᠢ ᠪᠢ ᠲᠠᠯᠠᠭᠠᠷᠳᠠᠭᠤᠯᠪᠠ᠃ ᠭᠡᠳᠦᠨ ᠬᠤᠪᠢ ᠶᠢᠨ ᠵᠦᠷᠢᠶ᠎ᠡ ᠨᠢ ᠮᠢᠨᠤ ᠬᠤᠪᠢ ᠪᠤᠶᠠᠨ ᠢ ᠦᠭᠡᠷᠡᠳᠡᠬᠦᠯᠵᠦ ᠮᠠᠯᠴᠢᠨ ᠵᠠᠶᠠᠭ᠎ᠠ ᠲᠦᠰᠢᠬᠦᠯᠪᠡ᠃ ᠪᠢ ᠤᠬᠢᠯᠠᠨ᠎ᠠ᠃ ᠡᠵᠢ ᠠᠷᠭ᠎ᠠ ᠪᠠᠷᠠᠭᠳᠠᠵᠦ᠄ ︽ᠬᠦᠳᠡᠭᠡ ᠪᠤᠯ ᠬᠦᠳᠡᠭᠡ ᠰᠢᠳᠡ᠂ ᠡᠪᠡᠳᠴᠢᠨ ᠦᠭᠡᠢ ᠰᠠᠶᠢᠬᠠᠨ ᠠᠮᠢᠳᠤᠷᠠᠪᠠᠯ ᠪᠤᠯᠤᠯ᠎ᠠ ᠰᠢᠳᠡ︾ ᠭᠡᠵᠤ ᠲᠠᠶᠢᠳᠬᠤᠷᠠᠭᠤᠯᠤᠨ᠎ᠠ᠃ ᠪᠢ ᠶᠤᠰᠤᠳᠠᠢ ᠡᠵᠢ ᠪᠠᠨ ᠵᠤᠪᠠᠭᠠᠬᠤ ᠰᠦᠨᠡᠰᠤ ᠡ᠃ ᠡᠵᠢ ᠠᠮᠳᠠᠳᠠᠢ ᠪᠤᠳᠠᠭ᠎ᠠ ᠬᠢᠭᠡᠳ ︽ᠢᠳᠡ ᠤᠤᠭᠤ︾ ᠭᠡᠵᠤ ᠱᠠᠯᠠᠨ᠎ᠠ᠃ ᠡᠵᠢ ᠶᠢᠨ ᠮᠢᠨᠢ ᠵᠤᠷᠢᠭᠵᠢᠭᠤᠯᠤᠯ ᠤᠨ ᠦᠭᠡ ᠴᠢᠬᠢᠨ ᠳᠤ ᠬᠤᠩᠬᠤ ᠪᠤᠯᠵᠦ ᠴᠡᠭᠡᠵᠢᠨ ᠳᠤ ᠴᠤᠩᠬᠤ ᠪᠤᠯᠪᠠ᠂ ᠪᠢ ᠨᠢᠯᠪᠤᠰᠤ ᠪᠠᠨ ᠠᠷᠴᠢᠵᠦ ᠪᠤᠰᠪᠠ᠃ ᠴᠢᠯᠦᠭᠡ ᠪᠠᠷ ᠢᠶᠠᠨ ᠰᠤᠮᠤᠨ ᠲᠦᠪ᠂ ᠰᠤᠷᠭᠠᠭᠤᠯᠢ ᠪᠠᠷ ᠬᠦᠷᠴᠤ᠂ ᠰᠤᠨᠢᠨ ᠰᠡᠳᠬᠦᠯ ᠡᠷᠬᠢᠬᠦᠯᠵᠦ᠂ ᠨᠤᠮ ᠵᠠᠬᠢᠶᠠᠯᠠᠵᠦ ᠤᠩᠰᠢᠪᠠ᠃ ᠤᠶᠤᠨ ᠪᠤᠳᠤᠯ ᠢᠶᠠᠨ ᠴᠢᠯᠦᠭᠡᠯᠡᠵᠦ ᠠᠮᠢᠳᠤᠷᠠᠬᠤ ᠳᠤ ᠨᠤᠮ ᠪᠤᠯ ᠨᠢᠭᠡ ᠶᠤᠰᠤᠨ ᠤ ᠬᠠᠨᠢ ᠨᠦᠬᠦᠷ᠃ ᠪᠢ ᠪᠠᠭ᠎ᠠ ᠰᠠᠭ᠎ᠠ ᠶᠠᠭᠤᠮ᠎ᠠ ᠪᠢᠴᠢᠵᠦ ᠤᠷᠤᠯᠳᠤᠬᠤ ᠳᠤ ᠡᠵᠢ ᠮᠢᠨᠢ ᠲᠠᠶᠢᠪᠤᠰᠢᠷᠠᠭᠰᠠᠨ ᠪᠤᠯᠤᠯᠳᠠᠢ ᠲᠤᠯᠤᠭᠠᠢ ᠶᠢ ᠢᠯᠢᠵᠦ ᠦᠭᠡᠳᠡ ᠠᠴᠠ ᠢᠨᠢᠶᠡᠮᠰᠦᠭᠯᠡᠨ᠎ᠡ᠃ ᠦᠪᠡᠷ ᠢ ᠲᠦᠷᠦᠭᠰᠡᠨ ᠦᠨᠡᠨ ᠪᠤᠷᠬᠠᠨ ᠪᠠᠶᠢᠬᠤ ᠳᠤ ᠦᠷᠦᠭᠡᠯ ᠤᠨ ᠱᠤᠭᠤᠭᠰᠠᠨ ᠪᠠᠷᠢᠮᠠᠯ ᠪᠤᠷᠬᠠᠨ ᠢᠶᠠᠷ ᠶᠠᠭᠠᠬᠢᠬᠤ ᠶᠤᠮ ᠪᠤᠢ᠂ ᠦᠨᠢᠳᠡ ᠶᠢᠨ ᠵᠢᠷᠭᠠᠯ ᠢ ᠲᠠᠭᠠᠳᠬᠠᠳᠠᠭ ᠵᠢᠩᠬᠢᠨᠢ ᠪᠤᠷᠬᠠᠨ ᠪᠠᠶᠢᠬᠤ ᠳᠤ ᠦᠭᠡ ᠦᠭᠡᠢ ᠮᠡᠯᠴᠡᠶᠢᠳᠡᠭ ᠰᠦᠮ᠎ᠡ ᠶᠢᠨ ᠪᠤᠷᠬᠠᠨ ᠢᠶᠠᠷ ᠶᠠᠭᠠᠬᠢᠬᠤ ᠶᠤᠮ ᠪᠤᠢ᠃      ᠮᠢᠨᠤ ᠡᠳᠦᠢ ᠲᠡᠳᠦᠢ ᠰᠤᠨᠢᠨ ᠮᠡᠳᠡᠭᠡ ᠪᠢᠴᠢᠭᠰᠡᠨ ᠨᠢ ᠢᠷᠡᠭᠡᠳᠦᠢ ᠶᠢᠨ ᠬᠠᠨᠢ ᠨᠦᠬᠦᠷ ᠲᠠᠢ ᠪᠤᠯᠬᠤ ᠤᠷᠢᠳᠠᠯ ᠶᠤᠮᠰᠢᠭ ᠪᠠᠭᠠᠷᠢᠨ ᠵᠠᠯᠠᠭᠤ ᠲᠠᠢ ᠲᠠᠨᠢᠯᠴᠠᠪᠠ᠃      — ᠲᠡᠶᠢᠮᠤ ᠬᠤᠯᠨ ᠠᠴᠠ ᠴᠢ ᠢᠷᠡᠬᠦ ᠠᠮᠠᠷ ᠦᠭᠡᠢ᠂ ᠲᠡᠷᠨ ᠭᠠᠵᠠᠷ ᠲᠤ ᠴᠢᠨᠢ ᠪᠢ ᠶᠠᠪᠤᠵᠦ ᠴᠢᠳᠠᠬᠤ ᠦᠭᠡᠢ᠃ ᠡᠵᠢ ᠮᠠᠰᠢ ᠵᠤᠪᠠᠭᠰᠠᠨ ᠪᠠᠶᠢᠷᠢ ᠲᠠᠢ ᠶᠠᠷᠢᠨ᠎ᠠ᠃ ᠠᠭᠠᠬᠢᠮ᠎ᠠ ᠵᠠᠯᠠᠭᠤ ᠨᠠᠰᠤᠨ ᠤ ᠠᠭᠠᠭ ᠲᠠᠢ ᠲᠤᠷᠠᠯᠠᠯ ᠭᠡᠭᠴᠢ ᠨᠢ ᠲᠡᠷᠨ ᠶᠤᠮ ᠤᠤ ᠳ᠋ᠠ᠂ ᠠᠮᠢᠳᠤᠷᠠᠯ ᠤᠨ ᠠᠳᠠᠷᠡᠮ᠎ᠠ ᠶᠢ ᠲᠠᠨᠢᠭ᠎ᠠ ᠦᠭᠡᠢ ᠪᠢ ᠠᠬ᠎ᠠ ᠲᠡᠬᠦᠤ ᠰᠠᠳᠤᠨ ᠦᠭᠡᠢ ᠬᠠᠮᠢᠭ᠎ᠠ ᠬᠤᠯᠠᠬᠢ ᠪᠠᠭᠠᠷᠢᠨ ᠢ ᠵᠤᠷᠢᠪᠠ᠃ ᠠᠶᠠᠯᠠᠨ ᠪᠠᠶᠢᠵᠦ ᠬᠦᠯ ᠤᠨ ᠴᠢᠯᠡᠭᠡ ᠶᠢ ᠮᠡᠳᠡᠨ᠎ᠡ᠂ ᠠᠮᠢᠳᠤᠷᠠᠨ ᠪᠠᠶᠢᠵᠦ ᠬᠦᠮᠦᠨ ᠤ ᠬᠦᠴᠢᠷ ᠢ ᠮᠡᠳᠡᠨ᠎ᠡ ᠭᠡᠳᠡᠭ ᠪᠤᠯᠵᠦ ᠡᠵᠢ ᠶᠢᠨ ᠢᠶᠠᠨ ᠲᠦᠷᠬᠦᠮ ᠲᠦᠷᠦᠯ ᠢᠶᠠᠨ ᠰᠠᠨᠠᠳᠠᠭ ᠤᠨ ᠰᠢᠨᠠᠯᠭᠠᠯ ᠢ ᠤᠶᠢᠯᠠᠭᠠᠪᠠ᠃ ᠡᠵᠢ ᠠᠪᠤ ᠪᠠᠨ ᠰᠠᠨᠠᠨ᠎ᠠ᠂ ᠠᠬ᠎ᠠ ᠲᠡᠬᠦᠤ ᠨᠠᠷ ᠢᠶᠠᠨ ᠰᠠᠨᠠᠨ᠎ᠠ᠃ ᠬᠠᠷᠢᠭᠠᠳ ᠬᠠᠷᠢᠭᠠᠳ ᠤᠴᠢᠮᠠᠷ ᠰᠠᠨᠠᠨ᠎ᠠ᠃ ᠲᠡᠭᠡᠭᠡᠳ ᠭᠡᠷ ᠲᠡᠭᠡᠨ ᠬᠠᠷᠢᠳᠠᠭ ᠶᠤᠮ ᠪᠢᠯᠨ᠃ ᠰᠠᠨᠠᠭᠠᠳ ᠶᠠᠪᠤᠬᠤ ᠳᠤ ᠰᠠᠳᠤᠨ ᠤᠶᠢᠷ᠎ᠠ᠂ ᠰᠠᠵᠢᠯᠠᠭᠠᠳ ᠬᠦᠷᠬᠦ ᠳᠤ ᠨᠤᠳᠤᠭ ᠤᠶᠢᠷ᠎ᠠ ᠭᠡᠳᠡᠭ ᠢᠶᠠᠷ ᠡᠭᠡᠯᠵᠢ ᠶᠢᠨ ᠮᠠᠰᠢᠨ ᠳᠤ ᠰᠠᠭᠤᠳᠠᠭ ᠴᠦ ᠡᠳᠦᠷ ᠲᠡᠭᠡᠨ ᠬᠦᠷᠳᠡᠭ᠃      ︽ᠰᠠᠷᠠᠭᠤᠯ ᠰᠠᠶᠢᠬᠠᠨ ᠲᠠᠯ᠎ᠠ ᠪᠠᠶᠢᠨ᠎ᠠ      ᠰᠠᠨᠠᠭ᠎ᠠ ᠪᠠᠷ ᠢᠶᠠᠨ ᠲᠤᠪᠳᠤᠯ ᠳ᠋ᠠ ᠲᠡᠷᠭᠡ ᠮᠢᠨᠢ      ᠰᠠᠯᠤᠭᠠᠳ ᠤᠳᠠᠭᠰᠠᠨ ᠨᠤᠳᠤᠭ ᠲᠤ ᠮᠢᠨᠢ      ᠰᠠᠭᠠᠳ ᠦᠭᠡᠢ ᠲᠦᠷᠭᠡᠨ ᠬᠦᠷᠦᠬᠦᠯ ᠳ᠋ᠠ︾      ᠦᠨᠡᠨ᠂ ᠲᠤᠪᠳᠤᠯᠤᠭᠰᠠᠨ ᠨᠢ ᠬᠤᠷᠳᠤᠨ ᠤ ᠬᠢ ᠴᠦ ᠶᠤᠮ ᠤᠤ᠂ ᠲᠤᠭᠳᠤᠯᠤᠭᠰᠠᠨ ᠤ ᠶᠡᠭᠡ ᠶᠢᠨ ᠬᠢ ᠴᠦ ᠶᠤᠮ ᠤᠤ᠂ ᠨᠤᠳᠤᠭ ᠤᠨ ᠵᠠᠬ᠎ᠠ ᠤᠷᠤᠬᠤ ᠳᠤ ᠨᠢᠳᠤ ᠪᠦᠷᠦᠯᠵᠡᠭᠡᠳ ᠨᠢᠯᠪᠤᠰᠤ ᠭᠤᠭᠤᠵᠢᠭᠠᠳ ᠯᠨ᠂ ᠤᠷᠢᠳᠤ ᠠᠭᠤᠯᠨ ᠮᠢᠨᠢ ᠦᠰᠴᠢᠭᠡᠭᠰᠡᠨ᠂ ᠤᠯᠤᠰ ᠤᠳ ᠨᠢ ᠤᠯᠠᠮ ᠵᠠᠯᠠᠭᠤᠵᠢᠴᠢᠬᠠᠭᠰᠠᠨ᠂ ᠪᠠᠶᠢᠰᠢᠩ ᠭᠡᠷ ᠤᠳ ᠨᠢ ᠬᠢᠯᠠᠶᠢᠴᠢᠬᠠᠭᠰᠠᠨ᠂ ᠪᠠᠭ᠎ᠠ ᠶᠢᠨ ᠬᠦᠶᠦᠳᠡᠭ ᠵᠦᠷᠢᠭ ᠲᠤᠷᠠᠶᠢᠴᠢᠬᠠᠭᠰᠠᠨ ᠬᠠᠷᠠᠭᠳᠠᠨ᠎ᠠ᠃ ᠬᠦᠭᠡᠷᠦᠬᠦᠢ ᠡᠵᠢ ᠮᠢᠨᠢ ᠬᠠᠷᠢᠬᠤ ᠪᠤᠯᠭᠠᠨ ᠳᠤ ᠬᠤᠯᠨ ᠠᠴᠠ ᠲᠤᠰᠤᠨ᠎ᠠ᠃ ᠲᠡᠮᠡᠦᠯᠤᠭᠡᠳ ᠤᠴᠢᠭᠰᠠᠨ ᠨᠤᠳᠤᠭ ᠮᠢᠨᠢ ᠰᠠᠶᠢᠬᠠᠨ᠂ ᠲᠡᠪᠡᠷᠢᠭᠡᠳ ᠠᠪᠤᠭᠰᠠᠨ ᠡᠵᠢ ᠮᠢᠨᠢ ᠬᠠᠯᠠᠭᠤᠬᠠᠨ᠃ ᠬᠤᠶᠠᠷ ᠬᠦᠤ ᠪᠠᠨ ᠬᠤᠶᠢᠨ᠎ᠡ ᠪᠠᠨ ᠬᠠᠶᠠᠵᠦ ᠪᠢ᠂ ᠡᠵᠢ ᠪᠠᠨ ᠵᠦᠭᠯᠡᠵᠦ ᠠᠯᠬᠤᠬᠤ ᠳᠤ ᠬᠤᠷᠸ᠎ᠠ ᠮᠢᠨᠤ ᠯᠨ ᠶᠤᠮ ᠰᠢᠭ᠋ ᠭᠤᠶᠤ ᠪᠠᠶᠢᠭᠰᠠᠨ ᠡ᠃ ᠡᠵᠢ ᠬᠤᠷᠢᠶᠠᠨ ᠨᠦᠭᠡᠴᠡᠯᠡᠭᠰᠡᠨ ᠢᠳᠡᠭᠡᠨ ᠤᠮᠳᠠᠭᠠᠨ ᠢᠶᠠᠨ ᠪᠦᠬᠦᠨ ᠢ ᠭᠠᠷᠭᠠᠨ ᠲᠠᠶᠢᠯᠠᠳᠠᠭ᠃ ᠮᠠᠯ ᠬᠠᠷᠠᠬᠠᠨ ᠭᠡᠵᠢᠭᠡ ᠲᠠᠢ ᠡᠵᠢ ᠶᠢ ᠪᠠᠨ ᠪᠤᠭᠤᠷᠤᠯ ᠪᠤᠯᠤᠨ᠎ᠡ ᠭᠡᠵᠤ ᠪᠤᠳᠤᠭ᠎ᠠ ᠦᠭᠡᠢ᠂ ᠮᠡᠨᠳᠤᠭᠡᠨ ᠬᠢᠯᠠᠷᠠᠳᠠᠭ ᠨᠠᠰᠤ ᠶᠢ ᠨᠢ ᠵᠤᠭᠰᠤᠨ᠎ᠡ ᠭᠡᠵᠤ ᠰᠠᠨᠠᠭ᠎ᠠ ᠴᠦ ᠦᠭᠡᠢ᠃ ᠤᠨ ᠵᠢᠯ ᠤᠨ ᠤᠳᠠᠭᠠᠨ ᠳᠤ ᠪᠡᠶ᠎ᠡ ᠶᠢᠨ ᠡᠷᠬᠢ ᠱᠤᠷᠠᠭ ᠨᠢ ᠡᠯᠡᠭᠳᠡᠵᠦ᠂ ᠬᠦᠢᠳᠡᠨ ᠨᠦᠢᠳᠠᠨ ᠳᠤ ᠲᠠᠭᠠᠷᠠᠵᠦ ᠬᠦᠨᠳᠤ ᠬᠦᠳᠡᠯᠮᠦᠷᠢ ᠳᠤ ᠴᠢᠯᠡᠭᠰᠡᠨ ᠨᠢ ᠡᠪᠡᠳᠴᠢᠨ ᠤ ᠵᠠᠢ ᠠᠪᠴᠤ ᠤᠷᠳᠤ ᠨᠠᠰᠤᠯᠠᠬᠤ ᠴᠠᠭ ᠬᠤᠭᠤᠴᠠᠭ᠎ᠠ ᠶᠢ ᠨᠢ ᠵᠠᠯᠬᠢᠪᠠ᠃      ᠬᠤᠶᠠᠷ ᠮᠢᠩᠭᠠᠨ ᠤᠨ ᠤ ᠡᠬᠢ ᠪᠠᠷ ᠠᠬ᠎ᠠ ᠠᠴᠠ ᠪᠠᠴᠢᠮ ᠮᠡᠳᠡᠭᠡ ᠢᠷᠡᠪᠡ᠃ ᠪᠢ ᠡᠭᠡᠷ ᠲᠠᠳᠠᠨ ᠤᠬᠢᠯᠠᠵᠦ ᠶᠠᠭᠠᠷᠡᠤ ᠬᠠᠷᠢᠯ᠎ᠠ᠃ ᠪᠠᠭ᠎ᠠ ᠰᠠᠭ᠎ᠠ ᠡᠪᠡᠳᠴᠤ ᠡᠮ ᠲᠠᠩ ᠤᠤᠭᠤᠭᠠᠳ ᠠᠶᠠᠳᠠᠴᠢᠬᠠᠳᠠᠭ ᠪᠠᠶᠢᠭᠰᠠᠨ᠂ ᠶᠠᠭᠠᠬᠢᠬᠤ ᠳᠠᠭᠠᠨ ᠡᠶᠢᠮᠤ ᠲᠤᠮᠤ ᠠᠶᠤᠯ ᠬᠦᠮᠦᠷᠢᠴᠢᠭᠡᠪᠡ︖ ᠡᠵᠢ ᠡᠮ ᠶᠡᠬᠦᠯᠡᠬᠦᠯᠵᠦ ᠨᠠᠮ ᠨᠠᠮ ᠰᠦᠢᠯᠡᠭᠡᠯᠡᠨ ᠤᠨᠳᠠᠵᠦ ᠪᠠᠶᠢᠪᠠ᠃ ᠲᠠᠯ᠎ᠠ ᠳᠤᠨᠢ ᠤᠴᠢᠭᠠᠳ ᠪᠢ ᠶᠠᠭᠤ ᠴᠦ ᠭᠡᠯᠡᠵᠦ ᠴᠢᠳᠠᠭ᠎ᠠ ᠦᠭᠡᠢ᠂ ᠲᠠᠰᠤ ᠲᠡᠪᠡᠷᠢᠭᠡᠳ ᠤᠬᠢᠯᠠᠶ᠎ᠠ ᠯᠨ ᠭᠡᠵᠤ ᠪᠤᠳᠤᠭᠰᠠᠨ᠃ ᠠᠯᠭᠤᠷ ᠨᠢᠳᠤ ᠪᠠᠨ ᠨᠡᠭᠡᠭᠡᠵᠦ ᠨᠠᠳᠠ ᠶᠢ ᠬᠠᠷᠠᠴᠢᠬᠠᠭᠠᠳ᠄ ︽ᠮᠢᠨᠤ ᠰᠠᠷᠨ ᠢᠷᠡᠴᠢᠭᠡᠪᠡ ᠤᠤ︖︾ ᠭᠡᠪᠡ᠃ ᠲᠡᠷᠨ ᠨᠢᠭᠡ ᠪᠠᠶᠠᠷᠯᠠᠵᠦ ᠲᠤᠶᠠᠭ᠎ᠠ ᠲᠠᠳᠠᠭᠰᠠᠨ ᠴᠢᠷᠠᠢ ᠳᠤ ᠭᠡᠴᠢᠨᠡᠨ ᠶᠡᠭᠡ ᠡᠷᠡᠮᠡᠯᠵᠡᠯ ᠨᠢᠭᠤᠭᠳᠠᠵᠦ ᠪᠠᠶᠢᠭᠰᠠᠨ ᠪᠤᠯ︖      — ᠲᠡᠶᠢᠮᠤ ᠡ ᠡᠵᠢ ᠡ︕ ᠪᠢ ᠨᠢᠯᠪᠤᠰᠤ ᠪᠠᠨ ᠴᠢᠳᠠᠨ ᠶᠠᠳᠠᠨ ᠬᠤᠷᠢᠪᠠ᠃ ᠶᠠᠭᠤ ᠨᠢᠭᠡ ᠡᠵᠢ ᠶᠢ ᠪᠤᠯᠢᠶᠠᠭᠠᠳ ᠶᠠᠪᠤᠮᠠᠷ ᠰᠢᠭ᠋ ᠰᠠᠨᠠᠭᠳᠠᠭᠠᠳ ᠪᠢ ᠭᠠᠷ ᠢ ᠨᠢ ᠠᠳᠬᠤᠪᠠ᠃ ᠲᠦᠷᠢᠶᠡᠰᠤᠨ ᠲᠡᠷᠭᠡ ᠲᠠᠭᠤᠳᠠᠬᠤ ᠪᠠᠷ ᠭᠠᠷᠤᠭᠰᠠᠨ ᠠᠬ᠎ᠠ ᠤᠷᠤᠵᠦ ᠢᠷᠡᠭᠡᠳ᠂ ᠮᠠᠨᠤᠰ ᠡᠵᠢ ᠪᠠᠨ ᠠᠪᠴᠤ ᠭᠡᠷ ᠤᠷᠤᠭᠤ ᠪᠠᠨ ᠪᠤᠴᠠᠪᠠ᠃ ᠬᠠᠮᠤᠭ ᠰᠡᠬᠦᠯᠴᠢ ᠶᠢᠨ ᠬᠠᠮᠳᠤ ᠶᠢᠨ ᠠᠶᠠᠯᠠᠯ᠃ ᠡᠮᠴᠢ ᠶᠢᠨ ᠦᠭᠡ ᠶᠢ ᠰᠤᠨᠤᠰᠤᠭ᠎ᠠ ᠦᠭᠡᠢ ᠶᠤᠮ ᠴᠢᠨᠢ ᠡᠵᠢ ᠭᠡᠷᠬᠢᠨ ᠮᠡᠳᠡᠬᠦᠪ ᠳ᠋ᠧ᠂ ᠮᠠᠨ ᠤ ᠠᠬ᠎ᠠ ᠦᠬᠢᠨ ᠲᠡᠬᠦᠤ ᠵᠢᠷᠭᠤᠭᠤᠯᠨ ᠵᠦᠭ ᠵᠦᠭ ᠠᠴᠠ ᠬᠦᠷᠦᠯᠴᠡᠨ ᠢᠷᠡᠭᠰᠡᠨ ᠳᠤ ᠮᠠᠰᠢ ᠪᠠᠶᠠᠷᠯᠠᠵᠦ ︽ᠦᠷ᠎ᠡ ᠲᠠᠢ ᠬᠦᠮᠦᠨ ᠵᠢᠷᠭᠠᠨ᠎ᠠ᠂ ᠦᠨᠳᠦᠰᠤ ᠲᠠᠢ ᠮᠤᠳᠤ ᠱᠤᠤᠬᠢᠨ᠎ᠠ ᠭᠡᠵᠤ ᠬᠠᠰᠢᠯᠨ ᠰᠠᠶᠢᠬᠠᠨ ᠡ᠂ ᠡᠨᠡ ᠤᠳᠠᠭ᠎ᠠ ᠢᠯᠡᠬᠦᠤ ᠭᠡᠳᠤ ᠬᠤᠨᠤᠭᠠᠳ ᠶᠠᠪᠤ ᠡ᠂ ᠡᠵᠢ ᠨᠢ ᠡᠳᠡᠭᠡᠴᠢᠭᠡᠭᠡᠳ ᠰᠠᠶᠢᠨ ᠬᠤᠭᠤᠯᠨ ᠬᠢᠵᠦ ᠢᠳᠡᠬᠦᠯᠦᠶ᠎ᠡ︾ ᠭᠡᠨ᠎ᠡ᠃ ᠭᠡᠨ ᠴᠦ ᠲᠤᠤᠭᠠᠷᠴᠤ ᠴᠢᠳᠠᠭ᠎ᠠ ᠦᠭᠡᠢ ᠵᠢᠷᠦᠭᠡ ᠰᠡᠳᠬᠢᠯ ᠳᠡᠭᠡᠨ ᠮᠡᠭᠰᠢᠵᠦ ᠶᠠᠪᠤᠨ᠎ᠠ᠃      ᠡᠷᠳᠡᠨᠢ ᠶᠢᠨ ᠤᠰᠤ ᠴᠦ ᠪᠠᠶᠢᠶ᠎ᠠ ᠳ᠋ᠠ      ᠡᠵᠢ ᠪᠠᠨ ᠠᠪᠤᠷᠠᠵᠦ ᠠᠪᠬᠤ ᠶᠤᠮᠰᠠᠨ      ᠡᠷᠬᠢᠴᠡᠬᠦᠯᠵᠦ ᠴᠢᠳᠠᠭᠰᠠᠨ ᠦᠭᠡᠢ ᠤᠰᠤᠯ ᠢᠶᠠᠨ      ᠡᠬᠢᠯᠡᠵᠦ ᠨᠦᠬᠦᠵᠦ ᠬᠦᠢᠴᠡᠭᠡᠬᠦ ᠶᠤᠮ ᠰᠠᠨ᠃ ᠡᠵᠢ ᠮᠢᠨᠢ ᠮᠠᠨ ᠠᠴᠠ ᠦᠨᠢᠳᠡ ᠠᠶᠠᠷᠯᠠᠪᠠ᠃ ᠠᠪᠤ ᠬᠢᠭᠡᠳ ᠮᠠᠨ ᠤ ᠠᠬ᠎ᠠ ᠲᠡᠬᠦᠤ ᠵᠢᠷᠭᠤᠭᠤᠯᠨ ᠶᠢ ᠡᠩᠰᠡᠷᠡᠬᠦᠯᠵᠦ ᠠᠯᠵᠢᠶᠠᠯ ᠢᠶᠠᠨ ᠲᠠᠶᠢᠯᠬᠤ ᠭᠡᠰᠡᠨ ᠰᠢᠭ ᠲᠡᠷᠨ ᠬᠤᠯᠨ ᠬᠦᠮᠦᠨ ᠬᠦᠷᠳᠡᠭ ᠴᠦ ᠪᠤᠴᠠᠵᠦ ᠢᠷᠡᠳᠡᠭ ᠦᠭᠡᠢ ᠬᠠᠮᠢᠭ᠎ᠠ ᠭᠡᠳᠡᠭ ᠬᠠᠶ᠋ᠢᠭ ᠦᠭᠡᠢ ᠭᠠᠵᠠᠷ ᠶᠠᠪᠤᠪᠠ᠃ ᠬᠤᠷᠸ᠎ᠠ ᠳᠤ ᠰᠠᠷᠨ ᠦᠭᠡᠢ ᠰᠦᠨᠢ ᠬᠠᠷᠠᠩᠭᠤᠢ ᠪᠢᠰᠢ᠂ ᠰᠠᠶᠢᠬᠠᠨ ᠡᠵᠢ ᠪᠠᠨ ᠠᠯᠳᠠᠵᠦ ᠦᠨᠦᠴᠢᠷᠡᠬᠦ ᠯᠨ ᠬᠠᠮᠤᠭ ᠬᠠᠷᠠᠩᠭᠤᠢ ᠪᠠᠶᠢᠳᠠᠭ ᠢ ᠤᠶᠢᠯᠠᠭᠠᠭᠰᠠᠨ ᠮᠠᠨᠢ ᠤᠷᠦ᠋ᠢᠳᠠᠭᠰᠠᠨ ᠢ ᠶᠠᠭᠠᠬᠢᠨ᠎ᠠ᠃ ᠡᠳ᠋ ᠢᠶᠠᠷ ᠭᠠᠯᠬᠢᠭᠤᠯᠵᠦ ᠪᠠᠶᠠᠷᠬᠠᠨ ᠶᠠᠪᠤᠳᠠᠭ ᠢ ᠪᠢ ᠲᠡᠭᠡᠵᠦ ᠶᠡᠭᠡ ᠲᠤᠭᠤᠳᠠᠭ ᠦᠭᠡᠢ᠂ ᠡᠵᠢ ᠲᠠᠢ ᠪᠠᠨ ᠪᠠᠶᠢᠯᠴᠠᠵᠦ ᠢᠨᠢᠶᠡᠨ ᠵᠤᠭᠤᠭᠳᠠᠳᠠᠭ ᠬᠦᠮᠦᠰ ᠢ ᠬᠠᠷᠠᠬᠤ ᠳᠠᠭᠠᠨ ᠲᠤᠩ ᠠᠳᠠᠭ᠎ᠠ ᠬᠦᠳᠡᠯᠳᠡᠭ ᠢᠶᠠᠨ ᠨᠢᠭᠤᠬᠤ ᠦᠭᠡᠢ ᠡ᠃      ᠤᠶᠤᠨᠳᠤ ᠭᠠᠷ ᠤᠳᠠᠰᠤ ᠲᠦᠭᠡᠮᠡᠯᠵᠢᠭᠰᠡᠨ ᠴᠠᠭ ᠲᠤ᠂ ᠡᠵᠢ ᠲᠠᠢ ᠪᠠᠨ ᠵᠢᠰᠤ ᠵᠢᠰᠤ ᠪᠠᠨ ᠦᠵᠡᠵᠦ ᠵᠣᠭᠤᠭᠳᠠᠭᠰᠠᠨ ᠪᠤᠯ ᠶᠠᠭᠤᠳᠠᠢ ᠰᠠᠶᠢᠬᠠᠨ ᠪᠤᠢ︖ ᠡᠵᠢ ᠮᠢᠨᠢ᠂ ᠪᠤᠭᠤᠷᠤᠯ ᠭᠡᠵᠢᠭᠡ ᠶᠢ ᠴᠢᠨᠢ ᠲᠡᠬᠢᠵᠦ ᠰᠠᠮᠨᠠᠵᠦ ᠴᠢᠳᠠᠭ᠎ᠠ ᠦᠭᠡᠢ᠂ ᠪᠤᠷᠤᠭᠰᠢᠭᠰᠠᠨ ᠬᠤᠪᠴᠠᠰᠤ ᠶᠢ ᠴᠢᠨᠢ ᠡᠷᠬᠢᠵᠦ ᠤᠬᠢᠶᠠᠵᠦ ᠲᠡᠶᠢᠯᠦᠭᠡ ᠦᠭᠡᠢ᠂ ᠪᠤᠯᠤᠭᠰᠠᠨ ᠪᠤᠳᠠᠭ᠎ᠠ ᠨᠤᠭᠤᠭ᠎ᠠ ᠶᠢ ᠴᠢᠨᠢ ᠠᠮᠳᠠᠷᠬᠠᠵᠦ ᠬᠠᠨᠤᠭ᠎ᠠ ᠦᠭᠡᠢ᠂ ᠪᠠᠶᠢᠨ ᠲᠠᠬᠢᠨ ᠶᠠᠷᠢᠳᠠᠭ ᠦᠯᠢᠭᠡᠷ ᠢ ᠴᠢᠨᠢ ᠪᠦᠷᠢᠨ ᠰᠤᠨᠤᠰᠴᠤ ᠠᠮᠵᠢᠭ᠎ᠠ ᠦᠭᠡᠢ ᠪᠠᠷ ᠠᠯᠳᠠᠴᠢᠬᠠᠬᠤ ᠨᠢ᠃ ᠪᠢ ᠶᠠᠭᠠᠬᠢᠬᠤ ᠶᠢᠨ ᠠᠷᠭ᠎ᠠ ᠦᠭᠡᠢ ᠶᠡᠭᠡ ᠦᠷᠢᠳᠦᠪᠡ᠃ ᠦᠪᠡᠷ ᠢᠶᠠᠨ ᠬᠤᠮᠰᠠ ᠪᠠᠶᠢᠭᠠᠳ ᠬᠦᠮᠦᠨ ᠢ ᠦᠷᠦᠪᠳᠦᠬᠦ ᠲᠤᠷᠠᠳᠠᠢ᠂ ᠬᠠᠷᠮᠠᠨ ᠳᠠᠭᠠᠨ ᠮᠦᠩᠬᠦ ᠦᠭᠡᠢ ᠪᠠᠶᠢᠭᠠᠳ ᠪᠤᠰᠤᠳ ᠠᠴᠠ ᠵᠢᠭᠡᠯᠡᠵᠦ ᠦᠭᠬᠦ ᠲᠤᠷᠠᠳᠠᠢ ︽ᠢᠯᠡᠬᠦᠤ ᠬᠠᠶᠢᠷ᠎ᠠ︾ ᠶᠢᠨ ︽ᠠᠤᠭ᠎ᠠ ᠬᠦᠮᠦᠨ︾ ᠲᠠᠨ ᠢ ᠨᠤᠳᠤᠭ ᠲᠠᠭᠠᠨ ᠮᠦᠩᠭᠡ ᠨᠦᠢᠷᠰᠤᠬᠤ ᠦᠶ᠎ᠡ ᠳᠤ ᠬᠦᠭᠰᠢᠨ ᠵᠠᠯᠠᠭᠤ ᠦᠬᠡᠢ ᠤᠯᠠᠨ ᠬᠦᠮᠦᠨ ᠤᠬᠢᠯᠠᠭᠰᠠᠨ᠂ ᠬᠦᠮᠦᠨ ᠵᠤᠨ ᠳᠠᠭᠠᠨ ᠲᠤᠷᠠᠰᠤᠯ ᠲᠠᠢ ᠶᠠᠪᠤᠭᠰᠠᠨ ᠲᠠ ᠦᠯᠢᠳᠭᠡᠰᠢ ᠦᠭᠡᠢ ᠠᠭᠤᠤ ᠶᠡᠭᠡ ᠡ᠃
ᠢᠷᠡᠯᠲᠡ᠄ ᠲᠤᠮᠳᠠᠳᠤ ᠤᠯᠤᠰ ᠤᠨ ᠮᠤᠩᠭᠤᠯ ᠬᠡᠯᠡᠡ ᠤ ᠰᠤᠨᠢᠠ ᠮᠠᠳᠡᠭᠡ ᠶᠢᠨ ᠰᠦᠯᠵᠢᠶ᠎ᠠ